ولدك مدمن على البرتابل الحل مش انك تفكله التلفون

صحيح الي اول تلفون نشريوه لصغارنا يمثل أول خطوة لاثبات الذات .تبارك الله ولدي كبر و لا بنتي كبرت لازمهم '' برتابل'' كيما صحابهم و زيد ماننساوش المزايا متاع التلفون الي يخليني نطمان على صغيري كي يخرج مالدار و زيد كان هو بيات في المعهد و الا الكولاج خير و خيرين . لكن اكالتلفون الصغير يولي بقدرة قادر في وقت قياسي معبي " بالابلكاسيون "

وبعد أشهر قليلة ولادنا يوليو مدمنين على التلفون عاداتهم المزيانة كي كانوا صغار تتلاشى تولي تتوحش كلامهم و قعدتهم معاك . ولادنا طيشوا القصص و الكتب كي تقله برا شد كتاب كينك ضربته بين العينين ياخي اش فما ؟ فما التلفون الذكي الي تلقى فيه الي تحبه الكل و النتائج متاع الانفراد بهالمصيبة منجموا نعرفوهم كان بعد مدة طويلة ..

اليوم باش نتقاسم معاكم تجربتي في التعامل مع هالمشكل بش انجموا انقصوا من حدة الاثار الجانبية . التلفون فوق البيرو يعني ضمنا الخدمة الكل مبكلية . اذا ممنوع استعمال التلفون وقت انجاز الدروس بش يناقشك تقنعه الي هوا كان مركز مع الخدمة بش يكمل فيسع و مش بش يقص على التمرين في كل مرة يسمع "بيب"

اعمل معاه اتفاقية وقت القراية التلفون مسكر كلموا باش تثبت الي هو محترم المعاهدة و تلفونو مسكر . شوف باش تقلي الي مش باش يوافق نقلك أكيد باش يعملهم الكل أما كي يراك شديت صحيح باش يقتنع و البدايات ديما صعيبة عليك و عليهم لكن في قرارة نفسه يقول احسن حاجة عملتها امي و لا بابا كي يلقى روحوا تعود بالنمط الجديد . كل شي تعود و كسر العادات هي اصعب من تكوينها

ممنوع التلفون وقت النوم .صغيرك محتاج للنوم باش يقوم بكري في كامل نشاطه و يبدا نهاره و هو شبعان بالنوم مش بش يكون معدي ساعات و هو يجاوب على المساجات و كان لزم يلعب لعبة (أون ليني) و يعمل طلة عالانستاجرام

نبه صغيرك من مخاطر الذبذبات على صحته الي يزيد من خطورة استخدام الهاتف في الأطفال هو أن مخ الأطفال وخلاياهم العصبية في حالة نمو وغير مكتملة، ويمكن أن تؤثر الموجات الكهرومغناطيسية المنبعثة منه على الجهاز العصبي لهم، يمكن تؤدي إلى حدوث اضطرابات في النوم. حظ وفير للي بش يحاول يجرب و بربي متنساوش تشاركوني تجربتكم .نستنا مساجاتكم